উচ্চ বিভৱভেদৰ (ভল্টেজৰ) বিদ্যুৎ পৰিবাহী তাঁৰত বহি থাকিলেও চৰাইবোৰ‍ৰ বিদ্যুৎপ্ৰবাহিত হৈ মৃত্যু নহয় কিয়?

           সহজভাৱে ক'বলৈ গ'লে, চৰাইবোৰে তলৰ ভূ-পৃষ্ঠ বা ভূ-পৃষ্ঠৰ লগত সংযুক্ত একো বস্তু, অথবা আন এডাল পৰিবাহী তাঁৰ স্পৰ্শ কৰি নথকা বাবে, সেইবোৰেদি বিদ্যৎ পৰিবহণ নহয় আৰু সেই কাৰণেই চৰাই মৰণৰ পৰা হাত সাৰে। কিন্তু ওলমি পৰা কিছুমান চৰায়ে(যেনেঃ বাদুলি) আন এডাল পৰিবাহী তাঁৰ স্পৰ্শ কৰিলে, সেইবোৰ মৃত্যুৰ মুখত পৰিব পাৰে। 

          কোনো পৰিবাহী বা পৰিবাহী গুণসম্পন্ন পদাৰ্থৰ মাজেৰে বৈদ্যুতিক বৰ্তনীটো সম্পৰ্ণ হ'লেহে, সেই বৰ্তনীৰ মাজেৰে বিদ্যুৎ প্ৰবাহ হয়। আগতে কোৱাৰ দৰে যদি চৰায়ে মাটি বা মাটিৰ লগত সংযুক্ত গছ বা আন বস্তু, অথবা আন এডাল পৰিবাহী স্পৰ্শ কৰি থাকিলহেঁতেন, তেন্তে চৰাইৰ দেহৰ মাজেদিয়েই বিদ্যুৎ বৰ্তনীটো সম্পুৰ্ণ হৈ বৈদ্যুতিক প্ৰবাহ হ'লহেঁতেন। বেছিভাগ ক্ষেত্ৰ‍তে এই চৰ্ত পূৰণ নোহোৱা বাবে চৰাইবোৰ নিৰাপদভাৱে উচ্চ বিভ‍বযুক্ত বৈদ্যুতিক তাঁৰত বহি থাকিব পাৰে।